Səni sevən aşiqini,
Gülüm, incitmə-incitmə!
İcazə ver görüşünə
Gəlim, incitmə-incitmə!

İnsaf, mürvət yoxmu səndə?
Nə gözləyir bizi öndə?
Vallah qalıb ətəyiində
Əlim, incitmə-incitmə!

Həsrətindən doydum cana,
Nəğmə qoşdum yana-yana,
Gəlim düşüm ayağına
Ölüm, incitmə-incitmə!

Əsirinəm, necə danım,
Gərək sadiq yarım sanım,
Sənin ilə bir şadlanım,
Gülüm, incitmə-incitmə!

Dağ çəkirsən billə-bilə,
Sevən qəlbim gəlir dilə,
Ay qız, olmaz, olmaz belə
Zülüm, incitmə-incitmə!

Nəzər yetir yerə, göyə,
Yubanma, yetiş köməyə,
Gəlmir acı söz deməyə
Dilim, incitmə-incitmə!

Gəl, unutdur dərdi, səri,
Baxma dünyaya ötəri,
Qoy qəlbindən keçənləri
Bilim, incitmə-incitmə!

May 1996