Ayrılsaq da xəyallara qərq olma,
Qəlbimdə yerin var, yerin var sənin.
Həsrətdən gözəlim, saralıb-solma,
Qəlbimdə yerin var, yerin var sənin.

Nə olsun ki, hey qarşıma çıxan var,
Gülə-gülə salam verib baxan var,
Bir baxışla ürəkləri yaxan var,
Qəlbimdə yerin var, yerin var sənin.

Bir ürədə bir gözəlin sevgisi,
Yaşamaqdır doğma elin sevgisi,
Bülbül ilə qızılgülün sevgisi,
Qəlbimdə yerin var, yerin var sənin.

Həqiqi aşiqin sözü bir olar,
Təmiz sevgi ürəklərdə Kür olar,
Saf məhəbbət ziyarətgah, pir olar,
Qəlbimdə yerin var, yerin var sənin.

Yaxşı tanı sən Əlini dünyada,
Üzmə ondan sən əlini dünyada,
Mənim kimi sev əlini dünyada,
Qəlbimdə yerin var, yerin var sənin.

28 dekabr 2000