Səndən ayrı düşmək çətin,
Aman, darıxdım-darıxdım.
Qəlbimdədir məhəbbətin,
Yaman darıxdım-darıxdım.

Üzüm gülmür sənsiz axı,
Zirvə olmur çənsiz axı,
Qoyma bürüsün bu dağı
Duman, darıxdım-darıxdım.

Mən gülsəm də gülmür ürək,
Susmaq nədir bilmir ürək,
Alovlandım pərvanətək,
Canan, darıxdım-darıxdım.

Gülər bahar gəlişinə,
Güllər açar gəlişinə,
Deyəsən var gəlişinə
Güman, darıxdım-darıxdım.

Aydınlıqdır su dünyada,
Suçun varsa yu dünyada,
Ay Əlini bu dünyada
Duyan, darıxdım-darıxdım.

28 oktyabr 2001