Sağ əlidir anaların,
Gözəlidir anaların,
Qızılgültək açar qızlar,
Pərvazlanar, uçar qızlar,
Evdən-evə köçər qızlar.

Əzizlənər, yaşa dollar,
Bir-birindən göyçək olar.
Gültək ətir saçar qızlar,
Pərvazlanar, uçar qızlar,
Evdən-evə köçər qızlar.

Hər birin isməti var,
Məhəbbətdən qisməti var,
Olar eşqə düçar qızlar,
Pərvazlanar, uçar qızlar,
Evdən-evə köçər qızlar.

Ürəkdən sevər-sevilər,
Bir gün evə elçi gələr,
Atalardan qaçar qızlar,
Pərvazlanar, uçar qızlar,
Evdən-evə köçər qızlar.

«Vağzalı» dil açar bir gün,
Ağ göyərçin uçar bir gün,
Evdən gəlin köçər bir gün,
Pərvazlanar, uçar qızlar,
Evdən-evə köçər qızlar.