Bir yastığa baş qoyanlar
Yaşamasın qoşa, niyə?
Dəryada tale yelkəni
Gedib dəysin daşa, nyiə?

Sirr var açıb deyəmmirəm,
Yadlara baş əyəmmirəm,
Qövr eləyir ürəkdə qəm,
Bədxah çıxır başa, niyə?

Öz yoluyla gedir həyat,
Səyird atı sən ona çat,
Vəzifəli bürokrat
Öz həddini aşır, niyə?

Çeşmə şəffaf, göy səma nur,
Əfsanəvi bir dünya qur,
Vaxtı çatır xəzan olur
Dünya başdan başa, niyə?

Ağlar şəhidin anası,
Neçə igidin anası,
Yaslı didərgin anası
Qaçıb dağlar aşa, niyə?

Qəmlidir Odlar ölkəsi,
Yoxa çıxıb şən nəğməsi,
Sərhəddə düşmən gülləsi,
Baxmır ömrə, yaşa, niyə?

Əli Vəkil düşür ası,
Kimnən bölsün bəs bu yası?
Dolub səbrimin kasası,
Az qalıbdır daşa, niyə?

Oktyabr 1991