Qədəm basdım bu torpağa,
Odlu qəlbim döndü dağa,
Heyran oldum bağça-bağa –
Öz Muğanım, Millim kimi!

Neman ilə qucaqlaşdım,
Dalğalartək aşıb-daşdım,
Çəmənləri çox dolaşdım –
Gül-çiçəkli çölüm kimi!

Qayalarda sözüm qaldı,
Göy sularda gözüm qaldı,
Sahillərdə izim qaldı –
Gül topladım, gülüm kimi!

Bu torpaqda qeyrət gördüm,
Bu torpaqda cürət gördüm,
Bu torpaqda şöhrət gördüm –
Doğma obam, eli kimi!

1975