Nurdan yaranıb adı,
Nuranədir, Nuranə.
Yaman şeytan baladır,
Xoş gəlir hər görənə.

Öz ata-anasını
Çox istəyir hamıdan.
Cavab qaytarır dərhal
Nə soruşsan sən ondan.

Tanıyır telefonda
Anasının səsini.
Nanay-nanay, deyərək
Oxuyur nəğməsini.

Aldatmaq olmaz onu,
Yaman həssasdır, yaman.
Nənəsini axtarar
Gələn kimi bağçadan.

Bu qız gərək bağçada
«Əliyba»nı öyrənsin.
«Ana» – sözü yazmağa
Əvvəl «A»-nı öyrənsin!

Nurludur onun yolu,
Hər şeyi duyacaqdır.
Məktəbə yollanınca
Yazıb oxuyacaqdır.

Nurdan yaranıb adı,
Nuranədir, Nuranə.
Yaman şeytan baladır,
Xoş gəlir hər görənə.