Güldü çəmən, güldü çiçək,
Ətir saçdı çöl, biçənək,
Ötdü quşlar nəğməkar tək
Yay tətili günlərində.

Düşərgələr gəl-gəl dedi,
Qucağımda dincəl, dedi.
Göy yamaclar əl elədi
Yay tətili günlərində.

Bir cənnətdir Vətənimiz,
Ana kimi sevirik biz,
Gözəl olur mavi dəniz
Yay tətili günlərində.

Uşaqların şən nəğməsi,
Şəlalənin zümzüməsi,
Qanadlanır gülüş səsi
Yay tətili günlərində.

Çayda çimdik, gündə yandıq,
Neçə-neçə dost qazandıq,
Məktəbi də tez-tez andıq
Yay tətili günlərində.

Döndük doğma məktəbə biz,
Dilə gəldi ilk zəngimiz,
Beş qiymətlər hədiyyəmiz
Yay tətili günlərindən!