Məni yolumdan eyləyən,
Ürəyimi qan eyləyən,
Halı pərişan eyləyən
Dildarımsan, dildarım, gəl.

Səni hər gün anıram mən,
Ülvi mələk sanıram mən,
Saf eşqindən yanıram mən,
Dildarımsan, dildarım, gəl.

Gözüm üstə yerin vardır,
Mənalı sözlərin vardır,
Sevməyənə dünya dardır,
Dildarımsan, dildarım, gəl.

Baxma kimsənin sözünə,
İnan qəlbinə, gözünə,
Gülən çox olar üzünə,
Dildarımsan, dildarım, gəl.

Arzulayır ürək səni,
Barı gəl çıx, görək səni,
Əli sevsin gərək səni,
Dildarımsan, dildarım, gəl.

5 yanvar 2002