Doldurmusan qəlbimdəki boşluğu,
Sən dünyama hardan gəldin, ay gülüm?
Bəxş elədin mənə könül xoşluğu,
Sən dünyama hardan gəldin, ay gülüm?

Bilməyirdim ünvanını, yerini,
Anlamırdım məhəbbətin sirrini,
Mən də çəkim gərək dərdi-sərini,
Sən dünyama hardan gəldin, ay gülüm?

Davranışın, söz-söhbətin məzəli,
De kim sevməz sənin kimi gözəli,
Təmiz eşqin, ilk sevdamın əzəli,
Sən dünyama hardan gəldin, ay gülüm?

Atmalıydım tənhalığın daşını,
Nəğmələrlə, sözlə qatım başını,
Bilməyirəm hələ dəqiq yaşını,
Sən dünyama hardan gəldin, ay gülüm?

Darıxmışdım, gözlərim yol çəkirdi,
Anlamırdım nə hikmətdi, nə sirdi?
Əli Vəkil təmiz eşqə əsirdi,
Sən dünyama hardan gəldin, ay gülüm?

10 iyun 2010