Axtarıb tapmışam səni,
Gəl eşit qəlbim deyəni,
«Hə» söylə, sevindir məni,
Elçim gələcək, ay gülüm.

Şad xəbərdən gözlər gülsün,
Qəlb şadlansın, üzlər gülsün,
Dərhal şirin çay süzülsün,
Doymayır ürək, ay gülüm.

Qarşıdadır nişan günü,
Unutmayaq o şən günü,
Bəxtimizə düşən günü
Gəl birgə seçək, ay gülüm.

Nişandan sonra toy gəlir,
Toylara layiq ay gəlir,
Sevən-sevənə tay gəlir,
Çiçəksən, çiçək, ay gülüm.

Gör necə gözəl adətdir,
Toy şənliyi səadətdir,
Bizə qalan məhəbbətdir,
Qoruyaq gərək, ay gülüm.

Anam da gəlin gözləyir,
Ay oğul, bir dillən, deyir,
Çox yubanma gəl sən, deyir,
Qərara gələk, ay gülüm.

22 dekabr 1999