Yad qapını döydü nədən?
Ox çinəmdən dəydi nədən?
Dərd qəddimi əydi nədən?
Ağlama, elim, ağlama!

Torpaqdan şəhid cücərir,
Xalq səngərə sinə gərir,
Vətən yenə qurban verir,
Ağlama, elim, ağlama!

Cəsurlarım, qılınc çalın,
Qaniçəndən qisas alın,
Vuruşuram əliyalın,
Ağlama, elim, ağlama!

Ha yalan de, ha Haqqa dan,
Yerdə qalmaz bu nahaq qan,
Belə getməz axı, dövran,
Ağlama, elim, ağlama!

Gözləyir al səhər bizi,
Qırat üstə yəhər bizi,
Qoy boğmasın qəhər bizi,
Ağlama, elim, ağlama!

Mart 1992