Sevimlisən, göyçəksən,
Yazda açan çiçəksən,
Gözəllikdə sən təksən,
Ala gözlümsən mənim.

Eşqin Günəş, eşqin dan,
Duy qəlbimi, ol həyan,
Can alansan, can alan,
Ala gözlümsən mənim.

Günəşlə gəl hər səhər,
Bəxtəvərsən, bəxtəvər,
Sən Leyliyə bərabər
Ala gözlümsən mənim.

Mənim üçün doğuldun,
Oda yananım oldun,
Dinim, imanım oldun,
Ala gözlümsən mənim.

Sən Əlinin həyatı,
Ulduzlu kainatı,
Ömrün toyu-büsatı,
Ala gözlümsən mənim.

6 yanvar 2002