Könül verib sevsən məni,
Dünya dağılmaz, ay gözəl!
Sev səni qəlbdən sevəni,
Dünya dağılmaz, ay gözəl!

Sevən canan göyçək olar,
Oda yanan ürək olar,
Əhdi-peyman gerçək olar,
Heç vaxt pozulmaz, ay gözəl!

Qoy yar olsun tale bizə,
Eşqimiz gəlməsin gözə,
Gəl sevdalı ömrü bəzə,
Yubanmaq olmaz, ay gözəl!

Bir vurarsa iki ürək,
Kədərlənmək nəyə gərək,
Sevda bağı açsın çiçək,
Gülləri solmaz, ay gözəl!

Əli Vəkil Haqq adamı,
Odlu gözlərin badamı,
Gedib üz tutsun yadamı?
Mənə məktub yaz, ay gözəl!

18 may 2002