Ay gözəl, gəl baxma mənə yad kimi,
Şıltaqlıq eyləyib qırma qəlbimi.
Dindirib könlümdə ən tarım simi,
Cavab ver sözümə, cavab ver, ay qız.

Heyran-heyran yenə gendən baxırsan,
İldırımtək niyə qəfil çaxırsan,
Ürəyimi vallah oda yaxırsan,
Cavab ver sözümə, cavab ver, ay qız.

Ucuz tutma məhəbbəti cahanda,
Adi sayma bu ülfəti cahanda,
Qorumuşam dəyanəti cahanda,
Cavab ver sözümə, cavab ver, ay qız.

Çatsın dada məhəbbətin həmişə,
Sən susursan, mat qalıram bu işə,
Salıb sevdamızı el dilə-dişə,
Cavab ver sözümə, cavab ver, ay qız.

Əlinin yuxusu ərşə çəkilib,
Səni ülvi bilib, ilahə bilib,
Aşiqlər həyatda sevib-sevilib,
Cavab ver sözümə, cavab ver, ay qız.

10 iyun 1960