Gül, ürəkdən gülək, gülüm,
Qönçələnsin ayım, ilim,
Gülüstanım, bahar fəslim,
Sən gül-çiçək istə məndən.

Məhəbbətin qəlbə dayaq,
Əhdi duyaq, eşqi duyaq,
Səadəti cüt qoruyaq,
Xoş gələcək istə məndən.

Alnıaçıq yaşayaq biz,
Hər şübhəni boşlayaq biz,
Ürəkdə eşq dayışaq biz,
Halal çörək istə məndən.

Əbədidir sönməz közüm,
Yad üzlərə baxmaz gözüm,
Sirdaşımdır ümid, dözüm,
Odlu ürək istə məndən.

Unudulmur eşq aləmi,
Rədd eləyək dərdi, qəmi,
Bu dünyada sən əhdimi
Doğru, gerçək istə məndən.