Vallah boğacaqdır yad nəfəs səni,
Yabançı səs səni, ögey səs səni,
Qoruya bilmədik niyə bəs səni?
Füsunkar diyarım, Kəlbəcərim, hey.

Dəlitək qışqırır Dəlidağ, Allah,
Qoynunda yurd salıb yad-daşnaq, Allah,
Kor etdi gözümü boğanaq, Allah,
Füsunkar diyarım, Kəlbəcərim, hey.

Səmədsiz, Şəmşirsiz Ceyran bulağı,
Çən-duman bürüyüb dərəni, dağı,
Xəyala dönübdür elin xoş çağı,
Füsunkar diyarım, Kəlbəcərim, hey.

Sürülər çəkilib çox yaylağından,
Gül dərə biləydim bir də bağından,
Göyçəyə aşaydım Keyti dağından,
Füsunkar diyarım, Kəlbəcərim, hey.

Yalçın qayaların qartalı hanı?
Qaçqının harayı tutub dünyanı,
Tanrım yerdə qoymaz bu nahaq qanı,
Füsunkar diyarım, Kəlbəcərim, hey.

Uşaqlar, qadınlar Murovdan aşdı,
Çaylar qəzəbindən kükrədi, daşdı,
Cəlladın, qatilin ürəyi daşdı,
Füsunkar diyarım, Kəlbəcərim, hey.

Xəyanət qurbanı olan məkanım,
Düşmən tapdağında qalan məkanım,
Hər kəndi, obası talan məkanım,
Füsunkar diyarım, Kəlbəcərim, hey.

Çox oldu yollarda, dağlarda donan,
Niyə tapılmadı halına yanan?
Xəyanət eylədi əslini danan,
Füsunkar diyarım, Kəlbəcərim, hey.

Xilas etməliyik qəfəsdən səni,
Qovaq başın üstən dumanı, çəni,
Bütöv görməliyik biz bu Vətəni,
Füsunkar diyarım, Kəlbəcərim, hey.
Qartallı dağlarım, Kəlbəcərim, hey!

15 may 1993