Bir vaxt burda yüz qırx min
Günahsız ürək susub.
Yüz qırx min arzu sönüb,
Yüz qırx min dilək susub.
Məsum körpələrin qışqırığından,
Yazıq anaların hıçqırığından
Adamlar sarsılıb –
Ahı, amanı, düşmənə nifrəti
Yüksəlib göyə.
Onların qəzəbi ürəklərində
Çevrilib bombaya, odlu gülləyə!
Yüz qırx min ürəyin
Qəzəb dolu səsindən
Bir mahnı bəstələnib –
Əbədiyyət mahnısı,
Qalibiyyət mahnısı.
Göyün, yerin mahnısı
Ölməzlərin mahnısı!
Hər il qələbə günü
Dalğalanır o mahnı,
Yüz qırx min faciəni
Yenə anır o mahnı!
Dayanmışam o qüllənin önündə,
O böyük, o möhtəşəm abidənin önündə.
Səslənir qulağımda
Qalibiyyət mahnısı!
Əbədiyyət mahnısı!
Göyün, yerin mahnısı!
Ölməzlərin mahnısı!

1974