Bəd gözdən qorusun səni Allahım,
Ay gözəl, necə də məlahətlisən.
Əritsin dumanı, çəni Allahım,
Ay gözəl, necə də məlahətlisən.

Hamıtək ürəkdən sevdin, sevildin,
Həyatın, sevginin qədrini bildin,
Dünya bir səhnədir, qəmləndin, güldün,
Ay gözəl, necə də məlahətlisən.

Sənin də öz bəxtin, öz taleyin var,
Ürəkdən savayı özgə nəyin var,
Tale qismətin var, gələcəyin var,
Ay gözəl, necə də məlahətlisən.

Ürəyin ipəkdir, saf eşqin ümman,
Nəcib xəlq eləyib səni Yaradan,
İlahə mələksən, ilahi insan,
Ay gözəl, necə də məlahətlisən.

Aldanma dünyada yalan vədlərə,
İnsanı tələyə salan vədlərə,
Bədbəxt olmayasan səhvinə görə,
Ay gözəl, necə də məlahətlisən.

5 fevral 2001