1. Abbasov Zöhrab Heydərəli oğlu
Eli andı Zöhrab da,
Mərd dayandı Zöhrab da.
Bu torpağı müqəddəs
Məkkə sandı Zöhrab da.
2. Abbasov Sabir Rzaqulu oğlu
On uşaqdan biri Sabir,
Yurdunun əsiri Sabir.
Həlak olmayıbdır o,
Diridir, diri Sabir.
3. Abbasova Fəridə Nəriman qızı
Üç balanın dərdi var,
Fəridəsiz ha sızlar.
Paltar sərdiyi yerdə
Güllələdi qansızlar.
4. Abduyev Tariyel Oruc oğlu
Yolu azadlıq yolu,
Düşməndi sağı, solu.
Yadlara baş əymədi
Tariyel Oruc oğlu.
5. Abdullayev Əyyub Mahmud oğlu
Hanı Əyyubum, hanı?
Tərk elədi dünyanı?
Hopdu al bayrağıma
Tökülən qızıl qanı.
6. Abdullayev Zahid Abdulla oğlu
Harda qaldı mərd Zahid?
Şəhid oldu mərd Zahid?
Azərbaycan elində
Mərd doğuldu, mərd, Zahid.
7. Abdullayev Tarıyel Hacıbala oğlu
Vətən adı dilimdə,
Qırğın oldu elimdə.
Uyuyur Xiyabanda
Daha bir Tarıyelim də.
8. Ağaverdiyev Aslan Əlikram oğlu
Babək qeyrətli Aslan,
Mətin, cürətli Aslan.
Ölümündən qorxmadı,
Mərd, dəyanətli Aslan.
9. Ağakişiyev Şakir Xandadaş oğlu
Sumqayıt-Bakı yolu,
Tankla, əsgərlə dolu.
Qanına qəltan oldu
Şakir Xandadaş oğlu.
10. Ağahüseynov Ağahəsən Yarı oğlu
Odlar oğlu Ağahəsən,
Nə yel idi bele əsən?
Minlərləydi şəhərimdə
Güllə atan, yolu kəsən.
11. Ağahüseynov Nurəddin Aslan oğlu
Düşmən aşdı öz həddini,
İnsaf, mürvət sərhəddini.
Azadlığın yoluna biz
Qurban verdik Nurəddini.
12. Alimov Ramis Xarisoviç
Seçəyin yaxşını, pisi,
Başın üstə çəni, sisi.
Niyə qoruya bilmədik
O gecə bəs biz Ramisi?
13. Allahverdiyev İlham Əjdər oğlu
Yox, baxmadı sözə gəlin,
Bəlkə gəldi gözə gəlin?
İlham orda təzə bəydi,
Fərizəmiz təzə gəlin.
14. Allahverdiyev Ruslan Kamal oğlu
Uçmayaydı təki güllə,
Ev yıxan o gecəki güllə.
Susdurubdur Ruslanımı,
Cəllad olub iki güllə.
15. Alməmmədov Teymur Yəhya oğlu
Doğulmuşdun Şahbuzda sən,
Tey ayrıldın, Teymur, bizdən.
Tələbəydin, yaş on səkkiz,
Adın düşməz dilimizdən.
16. Atakişiyev Bəhruz Tofiq oğlu
Yetməmişdin otuz yaşa,
Tanklarla çıxdın savaşa.
Bəhruz, toyun olmalıydı,
Ömrü nə tez vurdun başa?
17. Babayev Rəhim Vaqif oğlu
Bu dərdə döz, Yaqut ana,
Xatirə yaz, Yaqut ana.
İyirmi yaşlı Rəhimi
Yad et hər yaz, Yaqut ana.
18. Babayev Fuad Yavər oğlu
Arxa idi Fuad bizə,
Nə doğmaydı bu ad bizə.
Sağalmayan dağlar çəkdi
Qaniçənlər sinəmizə.
19. Babayeva Sürəyya Lətif qızı
Qurban getdi Sürəyya da,
Düşəcəkdir hər an yada.
Arzuları güllələrə
Hədəf oldu bü dünyada.
20. Bağırov Baloğlan Həbib oğlu
Hardasan, gəl ay Baloğlan,
Otur, dincəl, ay Baloğlan.
Niyə qəfil yaxaladı
Sən əcəl, ay Baloğlan?
21. Bağırov Telman Məlik oğlu
Dərd-qəm üzübdür canımı,
Yadlar axıtdı qanımı.
Haraylaram illər boyu
Mətanətli Telmanımı.
22. Bayramov İsabala Əli oğlu
Qovulmusan Hallavarda,
Od almısan Hallavardan.
Ay didərgin İsabala,
Hardan gəldi bəla, hardan?
23. Balahüseyn Mirqəzəb oğlu
Deyib-gülmür Sona sənsiz,
Lap doyubdur cana sənsiz.
Harda qaldı Balahüseyn?
Yetmir dərdi sona sənsiz.
24. Baxşəliyev Elçin Mirzə oğlu
Susdurdular Elçini,
El şöhrəti, el çini.
Ay ana, qız evinə
Göndərməyin elçini.
25. Baxşıyev Salman Babaxan oğlu
Sən ki iki ad daşıdın,
Fazildir, Salmandır adın.
Bir oğlun, üç qızın qalıb,
Gözünə bıçaqdı yadın.
26. Bessantina Vera Lvovna
On yeddiydi onun yaşı,
Çox idi dostu, sirdaşı.
Şəhid oldu Vera bala,
Ana axıdır göz yaşı.
27. Bədəlov Rövşən Seyfulla oğlu
Ah çəkirlər Lənkəranda,
Diz çökmədin çətin anda.
Rövşən, səni Şahinlə bir
Vurdular meşə qoynunda.
28. Boqdanov Valeri Zakiroviç
Qorumuşuq bu yeri biz,
Öz yurdumuz, öz yerimiz.
Azərbaycan oğlu idi,
Şəhid oldu Valerimiz.
29. Bünyadzadə Ülvi Yusif oğlu
Yoxsa küsdü Ülvi bizdən?
Ayrı düşdük Ülvimizdən.
Neçə qala qurmalıydı
Ülvi hissdən, ülvi sözdən.
30. Qayıbov Ələsgər Yusif oğlu
Ər oğlu, ər Borçalıda,
Qeyrət, hünər Borçalıda.
Qaraçöplü igid hanı?
Yox Ələsgər Borçalıda.
31. Qarayev İlqar Əli oğlu
Otuz bir idi yaşı,
Yoxdur ömür yoldaşı.
Əlindəydi İlqarın
Hələ subaylıq daşı.
32. Qasımov Abbas Şəmməd oğlu
Üç qardaş, bir bacıydınız,
Zöhrə üçün tacıydınız.
Didərgin düşdünüz, Abbas,
Qayğıya möhtacıydınız.
33. Qasımov Yusif İbrahim oğlu
Nigarla tək qalıb ana,
Urək-dirək verir ona.
Yusif, sənsiz neyləyəcək
Ömür-gün yoldaşın Rəna?
34. Qeybullayev Elçin Siyəddin oğlu
Xidmət yeri Əfqanıstan,
Orda çıxdın çox sınaqdan.
Yadlar doğma Bakımızda
Səni vurdular nahaqdan.
35. Qəniyev Mirzə Rzabala oğlu
Körpə Balan Şövqiyyə,
Yetim qalan Şövqiyyə.
Mirzə, sənsiz ananın
Naləsi qalxır göyə.
36. Qocamanov Əliyusif Bilal oğlu
Sənsiz dözmur Fərhad nəvən,
Fəryad edir, fəryad nəvən.
Əliyusif babam gəlsin –
Ha çağırır, heyhat, nəvən.
37. Quliyev Səxavət Balay oğlu
Səxavətin izi yolda,
Dörd balanın gözü yolda.
Allah, axı hardan Bilək
Nə gözləyir bizi yolda?
38. Eminov Vəfadar Osman oğlu
Vəfadardır adın sənin,
Əsiriydin bu Vətənin.
Söylədin ki, mən torpağın,
Bu yer, bu göy, su Vətənin.
39. Əbilhəsənov İlqar Yusif oğlu
İlqarımın düz ilqarı,
Pozardımı tez ilqarı?
Vallah yaman tez itirdik
Bu aləmdə biz İlqarı.
40. Əbülfətov Mircamal Mirsaleh oğlu
Məğrur gəzdi Mircamalım,
Yenilməzdi Mircamalım.
Bilsə idi Lənkərandan
Heç gəlməzdi Mircamalım.
41. Əzizov Habil Kommunar oğlu
Habil Kaman, bir də çalsın,
Adaşını yada salsın.
Hıçqıraraq tarım simlər
Dinləyəni oda salsın.
42. Ələkbərov Azər Nəsib oğlu
Necə dözüm, Azər bala,
Canım, gözüm Azər bala.
Hamımızdan üz döndərdi
Niyə bizim Azər bala?
43. Ələsgərov Zaur Rasim oğlu
Elə bildik gəlin gəlir,
Zaur, dəfnə gəlin gəlir.
Ana, dedin həlak olub?
Buna necə dilin gəlir?
44. Əlizadə Faiq Əbdülhüseyn oğlu
Faiq, unutmur Aynurun,
Gecələr yatmır Aynurun.
Min dil-ağız, ürək-dirək
Dadına çatmır Aynurun.
45. Əliyev Bayram Mədət oğlu
Zər atdın düşdü iki bir,
Namərdin bəxti gətirir.
Qaçqın-şəhid Bayram üçün
Ata, ana köks ötürür.
46. Əliyev Zahid Bayram oğlu
«Vedinin yanı dağlar»,
Zahidin hanı, dağlar?
Dərdli, didərgin ana,
«Balam, gəl», – deyib ağlar.
47. Əliyev Zəbulla Xeyrulla oğlu
Qatil vurdu Zəbullanı,
Torpaq üstə axdı qanı.
Nahaqdan da qırğın olar?
Hanı haqq-ədalət, hanı?
48. Əliyev Namiq Kamil oğlu
Namiqi çox gözlədilər,
İndicə gələr, – dedilər.
Ana qəlbi üsyan etdi,
Ah çəkdilər, qəm yedilər.
49. Əliyev Rüstəm Şahvələd oğlu
Nə bəlaydı, zaval idi?
Allah, nə qeylü-qal idi?
İgidlikdə bizim Rüstəm
Elə bil Rüstəmi-zal idi.
50. Əliyev Xəlqan Yusif oğlu
Qəfil hədəf Xəlqan oldu,
Gen sinəsi al qan oldu.
«Ordumuzun» bizə qarşı
İttihamı yaman oldu.
51. Əsədullayev Asif Famil oğlu
Səs verməyir Asif niyə?
Küsüb bizdən, küsüb niyə?
Düşmənlərin gülləsindən
O günahsız susub niyə?
52. Əsgərov Faiq Novruz oğlu
Qəm-kədərdir həyanım,
Ha odlanım, ha yanım.
Faiq Novruz oğlunu
Hey düşünüm, hey anım.
53. Əhmədov İlqar Hümbət oğlu
Borçalıdan gələn İlqar,
El qədrini bilən İlqar.
Fəxralıda doğulmuşdu
Bakımızda ölən İlqar.
54. Əşrəfov Rəhman İsmixan oğlu
Rəhman, doğuldun Binədə,
Cəsur oğuldun Binədə.
Altı aydı toy etmişdin,
Kənddə sakinsən yenə də.
55. Zülalov İsfəndiyar Adil oğlu
Yollar uzaq, İsfəndiyar,
Soyuq, sazaq, İsfəndiyar.
Təranə tək balasıyla
Çox solacaq İsfəndiyar.
56. İbrahimov İlqar Rəşid oğlu
Anan darıxır, İlqar,
Yollara baxır, İlqar.
Sənin dərdin qəlbini
Yandırır, yaxır, İlqar.
57. İmanov Elçin Beydulla oğlu
Elçin, yaşa dolmalıydın,
Arzuların, yolun aydın.
Kədərlidir bir el qızı,
Axı həkim olmalıydın.
58. İsayev Müşfiq Ağaəli oğlu
Doğulmuşdun Ağdaşda sən,
Niyə susdun bu yaşda sən?
Qorxu bilməz Koroğluydun,
Güləşdə sən, savaşda sən.
59. İsayev Rauf Soltanəhməd oğlu
Ay Rauf, gəl bircə an,
Dözmür Gülnar, Mehriban.
Deyirlər ki, atamız
Gələcəkdir bəs haçan?
60. İsayev Fəxrəddin Xudu oğlu
Ay Fəxrəddin, gözlər ağlar,
Bu kədərdən sözlər ağlar.
Səndən sonra bir gəlin də
Yas saxlayar, qara bağlar.
61. İsmayılov Rəşid İslam oğlu
İlqar, İradə atasız,
Dözmürlər dərdə atasız.
Elmira hey Rəşid deyir,
Bəlkə dadına çatasız?
62. İsmayılov Tofiq Babaxan oğlu
Gözəlliyə vurğun idin,
Gül-çiçəyə vurğun idin.
Tofiq, bacın deyir hər gün
Gələcyən vurğun idin.
63. İsmayılov Cavad Yunus oğlu
Dözəmməyir Əzizə,
Gör nə deyir Firuzə:
Atamız Cavad Qəmli
Şeir yazaydı bizə.
64. İsmayılov Ağanəzər Araz oğlu
Bir evə dön, yetir nəzər,
Doğmaların qəmli gəzər.
Evlənməmiş vidalaşdın
Otuz yaşda, Ağanəzər.
65. Yaqubov Nüsrət İsmayıl oğlu
Gözü yolda dörd Balan var,
Ciyərparan Fəqan, Nubar.
Bəs neyləsin Dilşad ana?
Məleykəylə Valeh ağlar.
66. Yefimiçev Boris Vasilyeviç
Vurmuşdular süngü ilə,
Vurmuşdular billə-bilə.
Boris axı günahsızdın,
Hardan tapdı səni güllə?
67. Yusupov Oleq Kərimoviç
Oleq sizə neyləmişdi?
Sinəsini güllə deşdi?
Nalə çəkir Tamara da,
«Bu nə bəla, bu nə işdi»?
68. Kazımov Əflatun Həşim oğlu
Şair təbli Əflatunum,
Mərd, ədəbli Əflatunum.
Səttarxanlar nəslindəndir,
Sevdi eli Əflatunum.
69. Kərimov Aleksandr Ramazan oğlu
Fəryad edir Nadya xala,
Kədərlidir Nadya xala.
Saşa, sənin qəbrin üstə
Hər gün gedir Nadya xala.
70. Kərimov İlqar İsa oğlu
Kim susdursun Səidəni?
Elçin də hey anır səni.
İlqar, harda qaldın, axı?
Gəl əzizlə cüt körpəni.
71. Kərimov Oqtay Eyvaz oğlu
Sən ev tikdin, ev yıxmadın,
Evi tarmar olsun yadın.
Ey didərgin, köçkün Oqtay,
Bağ-bağçası solsun yadın.
72. Marxevka Aleksandr Vitalyeviç
Saşa vurdu səni, Saşa,
Ayaqladı dini, Saşa.
Həkim idin, gözləyirdi
Səni Qala kəndi, Saşa.
73. Meyeroviç Yan Maksoviç
Bu torpağın övladı Yan,
Sənsiz dözmur oğlun Ruslan.
Elçin ilə bir çıxdınız,
Qan tutmuşdu sizləri, qan.
74. Məmmədov Vaqif Məmməd oğlu
Yetişmişdin otuz yaşa,
Vurammadın ömrü başa.
Vaqif, sən də qurban getdin,
Yaşa, şəhid kimi yaşa.
75. Məmmədov Vidadi Üzeyir oğlu
Susmur qızın Lalə sənsiz,
Qan-yaş tökür hələ sənsiz.
Ay Vidadi, oğlun Teymur,
Nəğmə yazır elə, sənsiz.
76. Məmmədov Eldar Zeynal oğlu
Söyləyin, Eldar hanı?
Bəlkə soraq var, hanı?
Şəhid dərdi saraldıb
Bacıxanım ananı.
77. Məmmədov İbrahim Behbud oğlu
Nənənin yol çəkir gözü,
İbrahimdir hər bir sözü.
Qafandan qovdular sizi,
Didərginin gülmür üzü.
78. Məmmədov Kamal Seyidqurban oğlu
Yadlar saldı qeylü-qalı,
Qarışdı Bakının halı.
Unutmarıq illər boyu,
Unutmarıq biz Kamalı.
79. Məmmədov Mehman Sahibəli oğlu
Ey hünərvər Mehmanımız,
Ər oğlu ər Mehmanımız.
Sən üç uşaq atasıydın,
Susdun hədər, Mehmanımız.
80. Məmmədov Məmməd Yarməmməd oğlu
Məmməd deyib, ağlar Afaq,
Qara geyib ağlar Afaq.
Susmaq bilmir anan heç vaxt,
Ürəkləri dağlar Afaq.
81. Məmmədov Rahim Vəliağa oğlu
Göydə şimşək çaxıb getdi,
Xanbulaqçay axıb getdi.
«Bu dünya bir pəncərədir»,
Mərd Rahim də baxıb getdi.
82. Məmmədov Səxavət Heydər oğlu
Deyib-gülmür Günel, Heydər,
Paylarına düşüb kədər.
Ay Səxavət, Şəhla qəmi
Daşıyacaq qəbrə qədər.
83. Məmmədov Şahin zahid oğlu
Şahin idin, şahin, bala,
Lənkərandan düşdün yola.
İstisu yolunda susub,
Şöhrət oldun bu mahala.
84. Məmmədova Larisa Fərman qızı
Səsləsəm səsə gəlməz,
Şənliyə, yasa gəlməz.
Qovuşub ölməzliyə,
Daha Larisa ölməz.
85. Mirzəyev Azad Əliheydər oğlu
Ay Azad, olmaz belə,
Dözmür Günel, Şəlalə.
«Atamız gəlməlidir!»
Onlar gözləyir hələ.
86. Mirzəyev Vaqif Səməd oğlu
Daşdı səbrin Binədə,
Vaqif, qəbrin Binədə.
Sənin üçün ağlayır,
Yas saxlayır Binə də.
87. Mirzəyev Elçin Hüseynqulu oğlu
– Elçin hanı? – dedi ana,
Danışıb-gülmədi ana.
Xeyli vaxtdır xəstə yatır,
Cana doyub, vallah, cana.
88. Mövludov Fuad Fərhad oğlu
Yanvarda düşdük oda biz,
Boyun əymədik yada biz.
Niyə arxa olammadıq
Dar ayaqda Fuada biz?
89. Muradov Mehman Əsəd oğlu
Ata yurdu Göyçə onun,
Yenilməz odlar oğlunun.
Mehmanla fəxr edir ana,
Ölməz adı var oğlunun.
90. Mustafayev Mahir Vaqif oğlu
Haraylayın Mahir gəlsin,
Dostlarıyla desin-gülsün.
Anasının göz yaşını
Öz əyliylə gəlib silsin.
91. Nəsibov Allahyar İskəndər oğlu
İtirdik biz Allahyarı,
Ömrü qaldı, Allah, yarı.
Canından da çox sevirdi
Bu torpağı, bu diyarı.
92. Nəsirov Yanvar Şiralı oğlu
Məğrur oğullar itirdik,
Xəzan vurdu, bar itirdik.
Adaş idi onlar axı,
Yanvarda Yanvar itirdik.
93. Nikolayenko Alla Alekseyevna
On səkkiz yaşlı Alla,
Niyə tez söndu, Allah?
Beş güllədən biri dəyib,
Günahsızdı vallah, billah.
94. Nişenko Andrey Aleksandroviç
Kimlər vurdu Andreyi?
Nə susdurdu Andreyi?
Niyə dönmədi evinə?
Gələn sordu Andreyi.
95. Orucov Şəmsəddin Əbdülhəsən oğlu
Cavad kəndində doğuldun,
Şəmsəddin, sən mərd ər oldun.
Altı yaşlı oğlun Cavad
Gültək açdı, sənsə soldun.
96. Poladi Saleh Əliqulu oğlu
Susdu Poladi Saleh,
Cəsur, mərd idi Saleh.
Şəhid oldu hamıtək,
Yox, yox, ölmədi Saleh.
97. Rəhmanov İslam Oqtay oğlu
Ağı deyir ana, bacı,
Yoxdur bu dərdin ədacı.
– İslamım, hardasan, harda?
Sənsiz günlər necə acı.
98. Rzayev Azad Allahverdi oğlu
Azad, dözmür anan Ceyran,
Səni hər an anan Ceyran.
Ağlayır Günel, Şəlalə,
Qəm oduna yanan Ceyran.
99. Rüstəmov Rövşən Məmməd oğlu
Seçəmmədik çəni, niyə?
Düşmən vurdu səni, niyə?
Qanlı şənbə gecəsində
İtirdik Rövşəni, niyə?
100. Sadiqov Yusif Allahverdi oğlu
Əzizinəm, sağ qol qalıb,
Bədən hanı, sağ qol qalıb?
– Oğlum Yusif gələcəkdir,
Həsrətdən anan qocalıb
101. Salahov Şərafəddin Müzəffər oğlu
Səkkiz övladdan biriydin,
Bu torpağın əsiriydin.
Dedin mayda evlənərəm,
Əhdi pozdun, Şərafəddin?
102. Semyonov Vladimir Aleksandroviç
Ay Volodya, susdun niyə?
O gecə qan qusdun niyə?
Rus əsgəri sərrast atdı,
Sən qovuşdun ölməzliyə.
103. Səfərov Bafadar Ağamirzə oğlu
Çox sevirdin bu torpağı,
Gördün iki oğul dağı.
Bafadara qıydı düşmən,
Söndü evinin çırağı.
104. Tokarev Vladimir İvanoviç
Şəhid yurdu Balaxanı,
Vladimir oğlun hanı?
Dima, Mişa yol gözləyir,
Necə susduraq ananı?
105. Turabov Tengiz Məmməd oğlu
Tengiz, uyu Xiyabanda,
Şəhid çox bu Xiyabanda.
Gözləyirlər Bolnisidə,
Edək toyu Xiyabanda?
106. Tuxtamışev Fərqət Şərəfullayeviç
Harda qaldın, ay Fərqət?
Günlər odu, ay Fərqət.
Zemfira bacın ağlar,
Sən görmədin toy, Fərqət.
107. Xammədov Baba Məhəmməd oğlu
Məktəbə get, Baba müəllim,
Misal həll et, Baba müəllim.
Nəvələrin hey ağlayır,
Tez gəl, kirit, Baba müəllim.
108. Xanməmmədov Cəbrayıl Hüseynxan oğlu
Səsim hər yana yayıla,
Göydə mələklər ayıla.
Yadlar niyə qıydı, Allah,
Əlli yaşlı Cəbrayıla?
109. Hacıyev Mübariz Məhəmməd oğlu
Dözmür Məleykə xala,
Yumaq olub az qala.
Hey əl açır göylərə,
Qayıt, Mübariz bala.
110. Həmidov İzzət Atakişi oğlu
Yetimdir Yeganə qızın,
Nalə çəkir yenə qızın.
Altmış yaşlı İzzət baba,
Qara gəldi sənin yazın.
111. Həsənov Əli Xudaverdi oğlu
Gecə evdən çıxdı Əli,
Yerə, göyə baxdı Əli.
Mahirəni ərsiz qoymaz,
Yəqin qayıdacaqdı Əli.
112. Həsənov Mehman İbrahim oğlu
Harda qaldı Mehmanımız?
Kaş olaydı mehmanımız.
Güllə atan yerindəcə
Daş olaydı, Mehmanımız.
113. Həsənov Müzəffər Qəzənfər oğlu
Qəlbi daşdı insafsızın,
Yas saxlayır iki qızın.
Bir cüt oğlun, ay Müzəffər,
Deyir bu dəhşətdən yazın.
114. Həsənov Sahib Nəsib oğlu
Bir oğlu var, iki qızı,
Ərsiz qoyub Ruhəngizi.
İndi evi Sahibsizdir,
Yandıracaq bu dərd bizi.
115. Həşimov İsrafil Ağababa oğlu
Atasızdır Günay, Aysel,
Xəbər tutsun qoy bütün el.
Balaların dözə bilmir,
Görüşə gəl, ay İsrafil.
116. Hüseynov Əlimərdan Əbil oğlu
Yazda toyun olacaqdı,
Qəlb sevinclə dolacaqdı.
Əlimərdan, yol kəsənlər
Nəmər, xələt alacaqdı.
117. Hüseynov Nəriman Vəli oğlu
Şəhidsən, şəhid, Nəriman,
Şagirdsən, şagird, Nəriman.
Cəlladoğlu – cəllad imiş
Yəqin sənə güllə atan.
118. Cavanşirov İlkin Zülqədər oğlu
Doqquz uşaq ata, deyir,
Gəl evə can ata, deyir.
İlkin Zülqədər oğlunu
Evində hamı gözləyir.
119. Cəfərov Əbülfəz Böyükağa oğlu
Çinar idi boyun sənin,
Olmalıydı toyun sənin.
Sevil-Əbülfəz sevgisi
Qurbanı oldu güllənin.
120. Şərifov Mürvət Rəhim oğlu
Harda qaldı doğma Qafan?
Dünya, sənin yoxdur vəfan.
Mürvət, yaman qansız idi
Sənə qəfil güllə atan.
Yanvar-fevral
1992-ci il