Sadiq olsa yar əhdinə, əsla ondan incimərəm,
Qonaq gəlsə qarşılaram, olar mehman, incimərəm.

Çox eləsin qoy nazını, həsrətinə sinə gərim,
Məhəbbətin atəşinə o desə yan, incimərəm.

Kimsə onu sevə bilməz bu dünyada mənim qədər,
Eyləyərəm mən canımı ona qurban, incimərəm.

Dönüb gəlsin bizə sarı, ayaq bassın gülüstana,
Gül dərərsə əgər o gül bağçamızdan, incimərəm.

Gec də olsa sev, ay gülüm, məhəbbət ki qocalmayır,
Yar ki, oldu sədaqətli, oda yanan, incimərəm.

Ulu dünya əzəl gündən sevənlərin beşiyidir,
İmtahana çəksin məni, qoy o canan, incimərəm.

Əhdə sadiq olmayana nifrət edir Əli Vəkil,
Alışarsa əgər ürək eşq odundan, incimərəm.

14 fevral 2003