Sənsizliyə necə dözüm?
Gülüm, yalqızam-yalqızam.
Yollarda qalıbdır gözüm,
Gülüm, yalqızam-yalqızam.

Yoxsan həsrət üzür məni,
Gəzəmmirəm çöl-çəməni,
Gəl bir dərək yasəməni,
Gülüm, yalqızam-yalqızam.

Qoy kimsə yarsız olmasın,
Güllər vədəsiz solmasın,
Həsrətdən gözlər dolmasın,
Gülüm, yalqızam-yalqızam.

Qonağımız ilk bahardı,
Hər yan gözümdə gülzardı,
İndi dünya mənə dardı,
Gülüm, yalqızam-yalqızam.

Yoxsa oyaq bəxtim yatdı?
Axı, ömür amanatdı,
Əli Vəkil, döz, həyatdı,
Gülüm, yalqızam-yalqızam.

24 avqust 2003