Gəlir, gedir yer övladı, zirvələrdə qar, əbədi,
Dədə Qorqud yadigarı bu qədim diyar, əbədi.

Aşiqlərin öz dünyası, eşq əhlinin öz dastanı,
Hər şey gəldi-gedərdisə, vəfa, etibar, əbədi.

Gündüz Günəş, gecələr Ay qonaq olur Göy gölümə,
Qoynunda ellər yaylayan sərin yaylaqlar, əbədi.

Qarabağım – cənnət diyar düşmənlərin tapdağında,
Heydərbaba, Səhənd dağı, Savalan, Qoşqar, əbədi.

Qoy yağının qismətinə boran düşsün, şaxta düşsün,
Doqquz iqlim Tanrı payı – torpağımda var, əbədi.

Muğamatım yer üzündə insanları heyran edir,
«Segah» mənim, «Zabul» mənim, oxunan «Qatar», əbədi.

Məmləkətin vurğunudu Əli Vəkil ömrü boyu,
Məclislərdə dilə gələn, ötən kaman, tar əbədi.

5 aprel 2003