Bahar libasını geyinmiş dağlar,
Çiçəklər nə gözəl, güllər nə gözəl!
Burda nəğməkardı ayna bulaqlar,
Kükrəyən gur çaylar, sellər nə gözəl!

Ətrindən məst oldum qızılgüllərin,
Laləylə bəzənmiş sakit çöllərin,
Söyüd sinəsinə tökdü tellərin,
Küləklər nə gözəl, yellər nə gözəl!

Möcüzə axtaran Göy-gölə baxsın,
Duyğular nur olub qəlbinə axsın,
Sahildən gül dərib döşünə taxsın,
Yaşıl haşiyəli göllər nə gözəl!

Yenə ilham versin nəğmələr bizə,
Sübh çağı bürünək dumana, sisə,
Şirinlik süzülsün hər dürlü sözə,
Ürəkdə səslənən tellər nə gözəl!

Fərəhdən daşlar da gəlibdir cana,
Günəş sığal çəkib burda hər yana,
Doyunca nəzər sal Azərbaycana,
Tarlalar nə gözəl, çöllər nə gözəl!

10 iyun 1981