Açıqdır üzünə qapım taybatay,
Qonaq gəl, şeirimin pərəstişkarı.
Səni alqışlasın göydə Günəş, Ay,
Qonaq gəl, şeirimin pərəstişkarı.

Könül dəftərimi vərəqlə, oxu,
Şairin ömrü də yuxudur, yuxu.
Hikmətli sözlərdən bir çələng toxu,
Qonaq gəl, şeirimin pərəstişkarı.

Gəl tanış ol, varım-yoxum kitablar,
Nə qədər istəsən bolca kitab var,
Mənim üçün onlar dövlət, onlar var,
Qonaq gəl, şeirimin pərəstişkarı.

Buyur, əyləş, söz süfrəmin başında,
Nə qazanıb gör şair bu yaşında?
Şeiriyyət var bu yurdun hər daşında,
Qonaq gəl, şeirimin pərəstişkarı.

Gör necə yaranır, nəğmələr, necə?
Kainat başımdan qəm ələr, necə?
Şairlər yuxusuz nə çəkir gecə?
Qonaq gəl, şeirimin pərəstişkarı.

Asan yaranmayır incilər, bilin,
Hər əsər dünyada sərvəti elin,
Həmişəürəkdən sevin, sevilin,
Qonaq gəl, şeirimin pərəstişkarı.

Nə qalacaq bu görüşdən yadında?
Əliylə yan bir nəğmənin odunda,
Unudulmaz ünvanın da, adın da,
Qonaq gəl, şeirimin pərəstişkarı.

11 avqust 1999