Boylanaraq arxanca mən,
Qaldım yalvara-yalvara.
Axır səndən «hə» cavabı
Aldım yalvara-yalvara.

Uzaq gəzdin zaman-zaman,
Qəlbdən sevdim səni inan,
Yolumu hey qapınızdan
Saldım yalvara-yalvara.

Ürəyimdə isti yerin,
Olmayacaq dərdi-sərin,
Sevə-sevə mən əsirin
Oldum yalvara-yalvara.

Xoşladım ellər qızını,
İllərlə çəkdim nazını,
Qəlbin məhəbbət sazını
Çaldım yalvara-yalvara.

Əli Vəkil sənsiz qalıb,
Sanki zirvə çənsiz qalıb,
Gülüm, yamanca saralıb,
Soldum yalvara-yalvara.

10 yanvar 1992