Saf ürəklə kim sevərsə yarını,
Yad edər həmişə vəfadarını.
Bəxtəvərdir dərsə eşqin barını –
Hamı deyər: əbədidir bu sevda.

İki gəncin ürəyi bir vurarsa,
Onlar eşqin keşiyində durarsa,
Sevgiləri ayı, ili yorarsa –
Hamı deyər: əbədidir bu sevda.

Dünyada kim sadiq qalsa əhdinə,
Dərk eləyər düz ilqar nə, əhdi nə?
Hər əzaba sinə gərər o yenə –
Hamı deyər: əbədidir bu sevda.

Aşiq ha can atar yarı görməyə,
Sevdiyini, bir dildarı görməyə,
Hazırsa həsrətə sinə gərməyə –
Hamı deyər: əbədidir bu sevda.

Əli Vəkil sözü bütöv, vəfalı,
Eşqin yolu sıldırımlı, cəfalı,
Könül bağı xoş ətirli, səfalı –
Hamı deyər: əbədidir bu sevda.

14 avqust 2002